Mətni doğru təhlil etməyənlərin cinsi tərbiyəsi Siyasət, Slider

Mətni doğru təhlil etməyənlərin cinsi tərbiyəsi

Fazil MUSTAFA,
millət vəkili
"Cinsi tərbiyənin tamamilə unudulması artıq qızlarla oğlanların bir yerdə təhsil almasının təhlükəli olduğunu iddia edənlərin arqumentlərini gücləndirir. Məktəb yaşından qızların təhsildən yayındırılaraq bir çox xoşagəlməz istiqamətlərə yönləndirilməsi sonrakı ailə faciələrinin, boşanmaların sürətlə artımının əsas səbəblərindən birini təşkil edir. Özümüzü statistik rəqəmlərlə aldatmayaq, bu sahədə Azərbaycan bəlkə də ən nəzarətsiz ölkələrdən biridir. Müvafiq dövlət qurumlarının məsələyə müdaxiləsi ancaq hansısa təsadüfi video paylaşımlarından sonra başlayır və nəticəyə elə də təsiredici rol oynamır. Milli dəyərlər, mentalitet, Həcər, Nigar, pafos, müqəddəs Azərbaycan ailəsi ritorikasını bir kənara tolazlayıb konkret bir ictimai faciənin önlənməsi ilə məşğul olmalıyıq."

Bu, mənim tərəfimdən iki ay öncə yazılmış bir statusdur və burada orta məktəbdə baş verən məlum hadisəyə münasibət bildirilmişdi. Bu statusdan sonra dostum bir yazar və ardınca da bir sayt rəhbəri geniş tənqidi məqalə ilə çıxış etdilər ki, bəs qızlarla oğlanların birgə təhsil almasının qadağan olunması barədə təklif yolverilməzdir, bəs bu bizi geriliyə sürükləyir və s. Üzərində durub cavab vermək istəmədim, çünki Azərbaycanda hansısa mətni dərindən oxuyub təhlil etmə ənənəsi olmadığını bildiyimdən, bu yazıların da yenə yanlış anlamaqdan qaynaqlandığına əmin oldum.

Bu mövzuya bir az fasilə vermişdik ki, ötənlərdə haradansa mesaj qutuma daxil olmuş özlərini ateist kimi tanıdan bir qrup vətəndaşın kitab təqdimatı ilə bağlı dəyirmi masasının videosundakı izlədiyim çıxışlardan biri diqqətimi cəlb etdi. Bir xanım iştirakçı pafosla İslam dininin təhlükəsi barədə çıxış edirdi və vurğulayırdı ki, bəs bizdə bir millət vəkili çağırış edir ki, qızlarla oğlanlar ayrı oxumalıdırlar. Bu çıxışdan sonra bir daha əmin oldum ki, Azərbaycanda mətnin məntiqi təhlili ilə bağlı ciddi problemlər var. Quranın da, elmi ədəbiyyatın da, bədii əsərin də mətnini bu cür öz anladığı formada yekun tezis kimi təqdim etmənin fəsadları isə insanlar arasında münasibətlərdə böyük əsəb gərginliyinə səbəb olur, mənasız mübahisələri genişləndirir.

İndi geri dönürəm yuxarıdakı dırnaq arasında təqdim etdiyim statusun bəsit izahına.
"Cinsi tərbiyənin tamamilə unudulması artıq qızlarla oğlanların bir yerdə təhsil almasının təhlükəli olduğunu iddia edənlərin arqumentlərini gücləndirir. Məktəb yaşından qızların təhsildən yayındırılaraq bir çox xoşagəlməz istiqamətlərə yönləndirilməsi sonrakı ailə faciələrinin, boşanmaların sürətlə artımının əsas səbəblərindən birini təşkil edir". İzahı kimə aydın olmadı? Mən iddia etmirəm ki, qızlarla oğlanların bir yerdə təhsil alması təhlükəlidir, sadəcə, qeyd edirəm ki, baş verən neqativ hallar dini inanclarına görə qızlarla oğlanların bir yerdə təhsil almasının təhlükəliliyini iddia edənlərin arqumentini gücləndirir. Məhz bu arqument güclənməsin deyə nəzarəti artırmaq, doğru metodologiyanı tətbiq etmək vacibdir. Əsas tezisim də budur ki, qızlarımızı məktəbdən yayındıra biləcək bütün əngəlləri ortadan qaldırmalıyıq. Burada anlaşılmayan bir fikir qaldımı? O halda bir mətni doğru dürüst oxuyub mənasını tutmayanlar nəyə etiraz edirlər? Əksinə, bütün çıxışlarımda qeyd edirəm ki, orta məktəblərə qızların cəlb olunması, son zəngə qədər oxuması vacibdir, bu və ya digər səbəbdən məktəbə getmək imkanı olmayan qızların da özəl qız məktəblərində bilik və peşə təhsili alması üçün bu cür məktəblər açmaq istəyən sahibkarların uzun müddətə vergidən azad edilməsi zəruridir. Ananın savadsız olduğu məmləkətdə ciddi intellektual elita formalaşa, sağlam millət yetişə bilməz. Bununla belə, məktəbin əxlaqsızlıq, narkomaniya yuvasına çevrilməsinə imkan tanımamalıyıq, bu yalnız şagirdlərə aid məsələ deyil, əxlaq naqisliyi olan müəllimlərin və direktorların məktəblərdə kök atmasının yolverilməzliyi prinsipinə ciddi əməl etməliyik. Valideynlər üçün məktəb təhlükəli məkan kimi hansısa neqativ hədəfə çevrilməməlidir, övladını güvəndiyi şəfqət mühiti kimi görməlidir.

Bu qeydi ona görə yazmağı borc bildim ki, bəzi insanlar cavab verilməyəndə özlərini konkret problem üzrə sağlam düşüncədə olduqlarına inandırmasınlar, sadəcə, bundan sonra mətni doğru təhlil edib nəticə çıxarmağa vərdiş etsinlər.
Müəllif : Cavid