BQP başqanı: "Cəhalətdə varlı-kasıb bölgüsü yoxdur" Siyasət, Slider

BQP başqanı: "Cəhalətdə varlı-kasıb bölgüsü yoxdur"
"Bu gün səlahiyyətli insanlardan biri ilə bir məclisdə söhbətim oldu. Soruşdum ki, niyə yoxsul insanlar üçün simvolik qiymətlərlə öz hüzr məclisini keçirməyə kömək göstərmirsiniz? Sağ olun, tikmisiniz, təmirli mərasim yerləriniz var, Allah qatında da savaba yazılar ki, neçə-neçə imkansız insanın vəziyyətini yüngülləşdirərsiniz.

Axı hamımıza bəllidir ki, bizim qondarma müsəlmanları tarix boyunca inandırıblar ki, ehsan əsasən yeməklə qarın doyurmaqdan ibarətdir və bir çox aztəminatlı insanlar qəfildən yaxınları vəfat edəndə yası yola vermək üçün bir çox hallarda borca girirlər. Bunlara izah etmək olmazmı ki, yeməyə çəkilən xərcləri mərhumun ailəsi üçün sərf etmək daha doğru olar? Gəlib rahatca çayla-qoğalla mərasimlərini keçirsinlər və sıxıntıya düşməsinlər? Həmsöhbətim and-aman etdi ki, istər Keşlədəki mərasim evində, istər də Babək prospektində yerləşən mərasim yerində məhz yeməksiz ehsan nəzərdə tutulmuşdu, adam öz çayını və qəndini gətirirdi və sadəcə, yüngül məbləğdə qazın-işığın pulunu ödəyirdi.

Lakin bu cür əlverişli şərtlərə baxmayaraq, ən yoxsul insan belə mütləq yemək vermək istədiyini bildirirdi və razılıq verməyəndə gedib çadıra pul verib qurdururdu ki, orada yemək ehsanı versin. Və həmin mərasim yerlərində elə olurdu ki, üç-dörd ay kiminsə məclisi olmurdu. Axırda məcbur qalıb yeməyə icazə verdik ki, zallar boş qalmasın. İndi buyurun, birinin pulu artıqlıq edir, özünü bu formada təqdim edir, bəs bu yoxsullara nə gəlib, Məhəmməd peyğəmbər belə mərasim keçirməyi deməyib, ağlı başında olan din alimləri tövsiyə etməyib, o zaman bu xərcin altına girməyə dəyərmi? Ötən günlərdə tanıdığım insanlardan biri məndən atasının yas mərasimi ilə bağlı məsləhət alırdı. Dedim ki, sadə məclis keçir və ancaq çay-xurma-halva ehsanı ver. Bir ziyalı nümunəsi göstər ki, başqaları da bu davranışı mənimsəsinlər. Söylədi ki, uzaqdan gələnlər var, yeməyi onlara görə vermək məcburiyyətindəyəm.

Dedim ki, uzaqdan gələn on-on beş qohum-tanış üçün yaxınlıqdakı kafedə yemək hazırlat, gedib orada yeyib geri gəlsinlər. İnsanlara alışdırmaq lazım ki, başqasının kədərinə şərik olmağa gəlmisiniz, qarnınızı doyuzdurmağı başqasının ölüsünün hesabına etməyin! Razılaşmadı və mən də israr etmədim. Çünki İslamı şəkilcə, görüntü ilə yaşayan bir cəmiyyətin insanlarına öz faydasına olanı təlqin etmək çox ağır işdir. Son vaxtlar Qarabağ savaşı kontekstində şəhidlərin varlı-kasıb bölgüsü aparıldığını xatırlayaraq bunları yazmağı düşündüm. Orduda bəlkə də belə bir bölgü barədə danışmağa müəyyən əsaslar var, ancaq cəhalətdə dəqiq bilirəm ki, varlı-kasıb bölgüsü yoxdur!"
Müəllif : Cavid